• ÖFFNUNGSZEITEN VERKAUF:
  • Mo - Fr:    07:30 - 18:30
    Sa:    09:00 - 16:00

GESCHICHTE:
Die föft Generation vezöllt:

title-separator

Ösen Ur-Ur-Grossvater, Anton Fässler-Speck, Weet ond Beck vom Sammelpatz, ischt en Visionär gse. E hät a di individuell Mobilität vo de Mensche globt. 1945, grad noch em 2. Wöltchrieg, het er, als Nüdautofachmaa, d’Garasch em Sammelplatz of em Bode vom Schwiegevater, em Ignaz Speck-Fässler baue, ohni das e gwesst het eb en vo sinere föf Gofe Intresse am Autogweb het.

De Zuefall hets wele, dass ösen Ur-Grossvater, de Willy Hirn-Fässler, die öltischt Töchte vom Sammelplatz kürotet het ond em 1946 e Garasch, Laschtwage- ond Cartransport, Taxi ond Fahrschuel, eröffned. 1954 ischt öseri Ur-Grossmueter Milly-Hirn Fässler chrank wode. Druf abi hät de Ur-Grossvater bis off s’Cargschäft ond Taxi alls ufge.

1972 het ösen Grossvater, de Peter Hirn-Fritsche e Halle vö Car baue ond si noche mit em Ur-Grossvater sinere Garasch tuscht. Em 13. Juni 1973 het er d’Sammelplatz-Garage AG gröndet. Hüt häässt si Hirn Appenzell AG.

De Betrib em Sammelplatz ischt gwachse ond het e lengeri mee Chonde kaa wo au epermol e Büle gmacht hend. Ond d’Sammelplatz-Garasch het e kee Schpenglerei kaa. Os de Zitig hends efahre, dass z’Oberriet e Schpenglerei–Molerei z vechaufe wär. E Johr schpöter, em 1978 hend si si chauft. Si hendere de Name Ost-Garage AG ge, hüt häässt si Hirn Oberriet AG.

Dö de Life- ond Laschtwagehandel sönds vo de Sammelplatz-Garasch mit diverse Renault PW-Vetreter im Kontakt gsee. Onder anderem au mit de Garasch Pöltinger z’Balgach. De Bruno Pöltinger het d’Garasch wele vechaufe. Zom de Garosseriebetrieb besse uuszlaschte ond zom Renault-A-Vetreter wede, hets is Konzept passt. Ond so isch es 1986 zor Öbenahm vo de Garasch Pöltinger cho. Si hendere do de Name Bad-Garage AG gee. Hüt häässts Hirn Balgach AG.

1988 – D’Autowölt het sich verendered. Konsumente wend nomeme usschliesslich mit em ägne Auto vo A noch B fahre. Nei, si benotzid fö grossi Schtreckene de Flüge ode Bahn. En Liefewagechond vo Staad mit eme Autovemietig het alteshalbe wele ufhöre ond het en Nochfolge gsuecht. Wegem verenderete Vecheesvehalte vo de Chonde, hend si sich fö de Chauf entschlosse. Staad – em Afang vo de A1 ond de A13 – het en Flughafe ond ligt i de Metti vo Öschtrich ond Dütschland. Seu vemietid au Lagerrüm fö Auto, Möbel ond anderi schpeirigi War. Si hend ere de Name Selftransport AG gee. Hü häässt si Hirn Rent AG.

Em Johr 2000 suecht de Ernst Rothen en Chäufer vö d’Garasch z’St. Galle, em Neudof osse. En grosse Lopf fö d Famili Hirn. Abe d’Famili häbt zeme. Jungs ond Alts packid die Möglichkeit bim Schopf ond bringid Hirn Automobile au i d`Hoptschtadt vo de Oschtschwiz. Si gröndid d’Zil-Garage St. Gallen AG.

So, jetzt hemmer als vezöllt. Jetzt fäälid gad no d’Persone wo hönde de Firma schtönd.

Öses Motto häässt: «Wenn nebed im Rintel dehem ischt, z’St. Galle schafft ond hie ond da, zom si erhole in Alpschtee goot, alewile, wenn em Auto nebes fählt, wäte vome Betrieb vo de Hirn Automobile bedient.»